Ffurfiwyd Côr Caerdydd gan Gwawr Owen ar Ebrill 1af 1992 er mwyn cystadlu yn Eisteddfod Genedlaethol Aberystwyth y flwyddyn honno.  Ar eu hymddangosiad cyhoeddus cyntaf, fe enillodd Côr Caerdydd y wobr gyntaf yn y brif gystadleuaeth gorawl.  Maent wedi cystadlu yn y Genedlaethol bob blwyddyn ers hynny, ac wedi ennill y wobr gyntaf naw gwaith. Maent hefyd wedi dod i’r brig yng Ngwyl Gorawl Corwen a Gwyl Fawr Aberteifi. 

Yn ystod y blynyddoedd diwethaf, mae Côr Caerdydd wedi datblygu perthynas agos gyda’r cyfansoddwr hynod o lwyddiannus, Karl Jenkins.  Clywir y côr ar CD Requiem Jenkins, ar DVD Mass for Peace, ac maent wedi perfformio gyda’r cyfansoddwr yn Neuadd Dewi Sant, y Royal Festival Hall a’r Gadeirlan yn Guildford. Yn ogystal, perfformiwyd Mass for Peace mewn cyngerdd gala arbennig yng Nghanolfan Mileniwm Cymru ar Fawrth 12ed 2006 gyda Karl Jenkins yn arwain.

Ar deledu, gwelwyd Côr Caerdydd ar Songs of Praise, Dechrau Canu, Dechrau Canmol, FA Classic, Noson Lawen, Y Croesholiad gan Stainer, , Gymanfa o Gastell San Dunwyd, Codi’r Tô, Ar y Groesffordd gyda Bryn Terfel, ac mae’r côr wedi ymddangos ar BBC  Radio Cymru, BBC Radio 2 yn Sunday Half Hour, Morning Service ar BBC Radio 4, Symffoni rhif 9 Beethoven  a Symffoni rhif 2 gan Mahler ar BBC Radio 3 gyda Cherddorfa a Chorws Genedlaethol Gymreig y BBC.

Dros y blynyddoedd mae Côr Caerdydd wedi cynnal cyngherddau ledled y wlad, nifer ohonynt i godi arian at achosion da ac wedi recordio cryno ddisg.  Mae’r repertoire yn cynnwys oratorios, cytganau o operau, darnau clasurol, caneuon o’r sioeau, caneuon gwerin a threfniannau o ganeuon poblogaidd. 

Yn y blynyddoedd diwethaf, mae Côr Caerdydd wedi ymddangos yn Choral Classics gyda’r Gerddorfa Ffilharmonig Frenhinol, canu o flaen cynulleidfa o bron i bum mil mewn Classical Spectacular yn Arena Ryngwladol Caerdydd, y Proms  Cymreig, Centenary Prom, canu o flaen aelodau o’r teulu brenhinol, cyngerdd yn Eglwys Gadeiriol Llandaf, Gwasanaeth Coffa’r Heddlu a nifer o gyngherddau elusennol.

Dros y ddwy flynedd ddiwethaf, ymddangosodd Côr Caerdydd gyda Bryn Terfel a Sinfonia Cymru mewn perfformiad o Symffoni rhif 9 gan Beethoven, yn y BBC Proms yn Llundain a nifer o gyngherddau amrywiol.

Yn Mai 2007, teithiodd Côr Caerdydd i Barga yn yr Eidal i berfformio Petite Messe Solonelle gan Rossini mewn cyngerdd a oedd ynghlwm ag Academi Cerdd Prifysgol Caerdydd. Yn ogystal, cafwyd y gwaith ei pherfformio ar noson lwyddiannus tu hwnt yn Eglwys Sant German yn Adamsdown, Caerdydd ar 16 Mai 2007 o dan arweinyddiaeth Massimiliano Moralli ac yng nghwmni pedwar myfyriwr o'r Academi.

Eleni hefyd, mae Côr Caerdydd yn dathlu 15 mlynedd o ganu corawl safonol ac yn edrych ymlaen i ddathlu'r achlysur yn ystod y flwyddyn.

Daw Gwawr Owen o Geredigion a bu’n ddisgybl yn Ysgol Yehudi Menuhin yn Surrey cyn graddio mewn Cerddoriaeth o Goleg y Brenin Llundain a gradd bellach o Brifysgol y Ddinas, Llundain.  Treuliodd nifer o flynyddoedd yn cynhyrchu rhaglenni cerdd i’r BBC, ac mae hi bellach yn gweithio fel cynhyrchydd radio/teledu ar liwt ei hunan ac yn trefnu cyngherddau/achlysuron cerddorol. Mae hefyd ynghlwm gyda Academi Llais Prifysgol Caerdydd, a gafodd ei sefydlu ym mis Ionawr 2007 o dan gyfarwyddyd y canwr byd enwog Dennis O'Neill CBE.